लुःक्‍सो

स्‍युबाक्‍याइदीला ख्‍य्‍वापीःजा ओःले पेःन पीःजाइ हैसेत च्‍योङरारा ओःङ्‍गोइ। लाःलेइगीइ खीमला पेःनपीःजाइ थाम्‍जेर लेःगाक्‍या सम्‍हालतीउए लाःपेइगीइ खीमला ख्‍य्‍वापीःजाइ सम्‍हालतीउए। ओःखो सोङगाराङ ख्‍य्‍वापीःजा पेःनपीजाला माःङबुरा फरक मेःबेएः। स्‍युबाक्‍याइ याःप युःमगीइ मीःनला एःक्‍योक सीःङ नोःरक्‍या पुःला तेर्कोइ पोःमोक्‍याला मेतेरएः। स्‍युबाक्‍याइ राःङ्‍गीइ युःलला थाम्‍जेर भन्‍दा छेस्‍योला मेःलीङक्‍याला याःबु याःबु साहन स्‍याःक्‍या खेर्ती फ्रेकाला डोगेन पेःउए।

युःलक्‍याला च्‍याङ छ्‍योम्‍बो लेःगाक्‍या पेःकोःसी लाःना युःलगीइ गोछ्‍योम्‍बो ख्‍य्‍वापीःजा पेःन पीःजा सु येःनाङ ओःङ्‍गोइ। गो छ्‍योम्‍बो डोजेला माःङबु मीःक्‍या सीसीथापथाप मेःबेएः। बुद्ध धर्म पेःगेनक्‍या माःङ्‍बु सोङगाराङ बुद्धाइ लाःमला डोगेनक्‍याइ लामाला छ्‍योम्‍बो नेकोइ ओःले लामाइ लाःक्‍योक थाम्‍जेरकीइ ङीःङ्‍गोइ। लामाक्‍याइदीङ छ्‍योम्‍बो पदला टीका लामा लाःकोइ। खुङला लोःदर्मे मेःलीङक्‍याला याःबु याःबु साःन स्‍याःक्‍या खर्ती थम्‍जेर फ्रेकाला डोउए।

युःलला च्‍याङ नीर्नयक्‍या पेःसुना छ्‍योम्‍बो मीःइ साल्‍ला लाःम्‍ले थाम्‍जेर डीक्‍ती पेःउए। युःलला च्‍याङ विकासकीइ लेःगा पेःगाला फीक्‍याले ओःङ्‍क्‍योक डोम्‍बोक्‍या ख्‍य्‍वापीःजा पेःन पीःजा थाम्‍जेरला स्‍युबा लुःक्‍सो आनुसार याःबुले पेःगेन पेःउए। चीले लाःप्‍ना खीम म्‍याक्‍योक सुङ म्‍या ७२ सालगी सायु तीङलादी खीमक्‍या रोःम्‍सी ओःले ताः जोगाला स्‍युःदेरा एः। सामाजीक लेःगाक्‍या लाःम कोःजे युःलला चाङदेनक्‍या पेःजेला थाम्‍जेर युःलबाक्‍या डीक्‍कोइ। युःलला सुङ नेःपा काःल्‍सीलाःना थाम्‍जेर डीक्‍ती आसपातल खुर्ती खेर्कोइ खुर्क्‍योककीइदी डेबा मेःलेनएः। डेबा एःलाःना तीबीरेःरे तेर्ती सहयोगाङ पेःउए।

राःङ्‍सा क्‍युःपाक्‍या ङ्‍युबुङ स्‍युबा याःबुले डीक्‍ती तेःकोइ कोःसीलाःना सहयोगाङ पेःलुङ चाउए। स्‍युबा युःलला सुलाङ कार्बाइ पेःकोःसीलाःना माःङ्‍बु मीःइ लाःक्‍योक तामले पेःउए। लाःकेनादी छ्‍योम्‍बो मीःइ लाःतेर्कोइ।

स्‍युबाक्‍याइ राःङगीइ युःलला स्‍युबा ताम ओःले नेःपाली ताम ङीक्‍कर लाःकोइ। तीःङसाङ हीन्‍दी ङेःम्‍बा तीबीरेःरे इङलीसाङ लाःसेगेनक्‍या एः। तोःङ्‍ला स्‍युबाक्‍याइ राःङ्‍गीइन पीजाक्‍याला राःङ्‍गीइ सेक्‍योकक्‍या लोपकेन पेःउकेलो। टोःजे लोपकेन्‍दी ओःन्‍डाबा वीसेसदी च्‍याङ म्‍याःकेलो। तोःङ तोःङला स्‍युबाक्‍या नेःपा डोगेना रीःइ कान्‍दामाल जडीबुटीकक्‍या साःदी टाःउकेलो। तीःङसाङ फीले ख्‍योङक्‍योक मेन साःउए।

स्‍युबाक्‍याइ केःङेन केःलाक्‍या लुःक्‍सोक्‍या प्राय पेःदी ह्‍योल्‍मो, लोःवा, ल्‍होमी, ओःले हेलम्‍बु स्‍यार्पाङ्‍युबु माःङ्‍बु च्‍योःङरा डीक्‍कोइ। ओःले दीखो क्‍युःपाक्‍या ङ्‍युबु राःङ्‍गीइ क्‍युःपाराःरारा नेकेन पेःउए। लाःलेइ साङक्‍याला ह्‍योल्‍मुङ्‍युबु डीक्‍ती साङक्‍या चलाइतीदीएः। स्‍युबाक्‍या फीले ओःङेन मीःक्‍याला याःबु वीकास पेःगेन मीःक्‍या लाःती ज्‍यालदेन पेःउए।